Seven Ages of Man

     William Shakespeare (1564–1616)

                    ALL the world ’s a stage,

And all the men and women merely players:

They have their exits and their entrances;

And one man in his time plays many parts,

His Acts being seven ages. At first the Infant,

Mewling and puking in the nurse’s arms.

Then the whining School-boy, with his satchel

And shining morning face, creeping like snail

Unwillingly to school. And then the Lover,

Sighing like furnace, with a woful ballad

Made to his mistress’ eyebrow. Then a Soldier,

Full of strange oaths, and bearded like the pard;

Jealous in honor, sudden and quick in quarrel,

Seeking the bubble reputation

Even in the cannon’s mouth. And then the Justice,

In fair round belly with good capon lined,

With eyes severe, and beard of formal cut,

Full of wise saws and modern instances,—

And so he plays his part. The sixth age shifts

Into the lean and slippered Pantaloon,

With spectacles on nose, and pouch on side;

His youthful hose, well saved, a world too wide

For his shrunk shank; and his big manly voice,

Turning again toward childish treble, pipes

And whistles in his sound. Last scene of all,

That ends this strange eventful history,

Is second childishness, and mere oblivion,

Sans teeth, sans eyes, sans taste, sans everything.

ވިދާޅުވޭ

މަންމާ ތިއީ .......

ޙަސަން ޒާހިރު   ޢަބްދުއްރަޝީދު

ނުވަމަސްދުވަހު  ގަދަވޭނުގައި،  "ހަށިފާރަ" އަށް   ހުސްވެސްވެފައި
             ނުވަ އެއް ދުވަސް  އިތުރަށް  ބަލާ،  މަންމާ  ތިއީ  ކެތްތެރިއެކޭ
ވިހުމުން   އެވާ ގާތްކަން  ބޮޑޭ،   ކަންނެތްވުމެއްނެތް  ބެލުމުގައި

ވިދާޅުވޭ

އިރާދައިގައި

ހަސަން ޒާހިރު ޢަބްދުއްރަޝީދު

 

އިންތިޒާމުގެ  މަތިން   ދުނިޔެ  ހިނގަމުންދަނީ

މިންތަކުން  ތަރިތަކާއި ހަނދު ދައުރުވެސް ވަނީ

ވިދުވަރަށްފަހު    ބައެއްފަހަރު     ގުގުރާލައޭ

ވިދުމަކާވެސް  ނުލައި    ހޮނުގުގުރި   އާދެއޭ

ދޫނިތައް   ރޯދިނެތި   އާދެ    ވަރުބަލިވެފައި

ފޫނި  ދެއްވާނެތީ  ދޭ    އެހެން   އުދުހިފައި

ފެންނަނީ ބިންގަނޑުން  އުސްގަނޑާ  އަޑިގަނޑޭ

ފެންކެތީ  ގަދަވިޔަސް  މަޑުވަނީ  ގަދަ  ކަނޑޭ

ނޫރުފުޅު  ހިތުތެރޭ   ލެއްވުމަށް   އުފުލިއަސް

ނޫނެކޭ  ނުލިބެޔޭ   މުޅި  އުމުރު  އެދުނަކަސް

މާނުކުމެ ރިޒުޤު   ގިތި  ފޯއްދުމަށް   އުތުރެއޭ

ވާނުވާ   ނޭނގިބަލަ    ވާދުވެގެން   ވެއްޓެއޭ

އެންމެފުރިހަމަ   އެމިންވަރު    އިރާދައިންވަނީ

ދެންނެވޭތޯ   ޝުކުރު   އަޅުތަކުން  އިސްވަނީ

ވިދާޅުވޭ

ކަލާގެ ދުނިޔެ - އަޅާގެ ޙަޔާތް

 

ހަސަން ޒާހިރު ޢަބްދުއްރަޝީދު

މަލާ  ގުލްޝަންގެ  ރަނިކަން   ލިބިފަވާ  ފަރި  ރީތި  މަލަކީތީ

މަލާ   މިކޮކާ    ވުޖޫދަށް    އައުމުގައިވާ    ސަބަބަކީވެސްތީ

މަހެއް   ގޮތުގައިވިނަމަ  އެދެނީ    ތިފެންކޯރުގެ   ތެރޭލެއްވުން

ލަހެއްނެތި ހޯދުމަށް  ގެދޮރެއް  ދުވުނު  ހިނދު  ފެނުނު ގަލަކީތީ

ފަލަކުގައި   ފިޔަ   ޖަހާތިބިތިބި  އެތައް   ޗާލޫވި  ތަރިތަކަކުން

ނަޒަރު  ހުއްޓާލެވުނު   ބެބުޅުންވި   އަލިގަދަ   ތަރިއަކީވެސްތީ

ޒަމާން އެތަކެއް ވެ  ދިޔައިރުވެސް  ކަލާ ދުރުކޮށްލެވެން  ނެތުމުން

ދަމާބާރެއް      އުފެދިފައިވާ      ދަގަތްފާނެއް    ކަލާހަމަތީ

ދުވާލު   ގަޑީ     މިނޫއުޑުގައި   ލެވޭ    ފޭރާމަކީ   ބަލަތީ

ދުވާ  އެކިއެކި   ކުލައިން   ޒީނަތްކުރާ  [ކުލައުޑް] އަކީވެސްތީ

ހިތަށް ފިނިކަން ލިބޭ ހިތްގައިމު  ފޮނި   އެކި   މިއުޒިކީ ރާގުން

މިތަންވަލުވެސް    ގޮވާލާތޯ    އެދޭ     ފަރި   ޢަންދަލީބޭތީ

ދެވޭނުދެވޭ   މިނޭނގޭ   އަނދިރި    ރޭތައްވެސް   އަމާންކޮށް

ދެވޭ  ރިހިއަލިތަކުން   މަގުވެސް  ކޮށަން ފަހިކޮށްލި  ހަނދަކީތީ

އަމާޒުގެ  މަންޒިލަށް ދިއުމަށް  ހަޔާތުގެ  ފުންމިކަނޑުގައި   އޮޑި

އާމާން  ދަތުރެއް   ލިބެންފަހިކޮށް  ޖެހޭ  ފައްސިޔަ  ވައޭ ބަލަތީ

އަޅާގެ  ޙަޔާތް  ވަނީ   ތިޔަ   ލޯބިވެތި   ޔާރާގެ   ދުނިޔޭގައި

ފަޅާލިޔަކަސް   އަތުން    ބީވުން    އެނޭދޭ   މާތް  ޖާހިރުތީ

ވިދާޅުވޭ

ދައްޗޭ ދައްޗޭ

 

 ޙުސައިން ޞަލާޙުއްދީން



 

މީހުންނާ އެކުވެ އުޅުން މިޒަމާނުގައި  ދައްޗޭ  ދައްޗޭ

ހީލަތާއި މަކަރުވަނީ   ހައްތާ   އަދަށް  މައްޗޭ މައްޗޭ

ދީނުގައި ހުރި  މޮޅުގޮތާ އަޚުލާޤު  ދޫކޮށް  ތިބެގެން

ބީވެ   ހެޔޮކަންކަމާ    ކިޔަނީ    ނުބައި  ގީފައްޗޭ

ރުޅިވުމާ ކުޅިވުމަކަށް ސަބަބެއް ހިލާ އެނގޭ  ނޯވެޔޭ

މުޅި ދުނިޔެ  ދެކޮޅުވުމަށް   ހައްތަހާ  ވަނީ  ފާގައްޗޭ

ބާރުލިބިގެން    ތިބިހާމީހުން   އެކީ   އެއްވެގެން

ކާރުޚާނާކުރަނީ    އަދުގައި    މޮޅަށް    ކަންފައްޗޭ

ޢަދުލްއިންސާފާ  ތެދާ  ރީތިހައި  ގޮތްތައް  ހޯދަން

މަދުނުކޮށް  އިއްވާ    ބަހަނާ   މިވަނީ   ކަންފައްޗޭ

ތަދުކަމާ ހައިހޫނުކަން އެންމެންތެރަށް އައިސްޖެހުމުން

ލަދުނެތިވެ މިސްކީނުވެގެން   އެންމެންވަނީ  ހުވަފައްޗޭ

ކަނިއެވެރިކަން މޮޅުކަމަށް ހީކޮށް  އޮތަސް ތާކުގައި

ދަނިވި ބިރުތައް  ނެތިގެން ގޮތަކާ  މަގެއްވާ   ދައްޗޭ

މީހުނާމީހުން   މިހާދުޝްމިނުވެ   ތެޅިފޮޅިގަތުމުން

ހީވެޔޭ ފެންނަ   ގޮތުން   ދުނިޔޭގެ  މީ  ކޮޅުމައްޗޭ

ފިކުރަކުން ބުއްދިޔަކުން އެއްވެސް ނެތޭ ހޯދޭ ގޮތެއް

ޙިކުމަތުން  ޤުދުރަތުގެމީ   ހުއްޓުންނުވާ   ބުރަފައްޗޭ

ގަރްބަޞޫރަތު އާދަމީ އިންސާންތަކުން ގިނައިންގިނަޔަސް

ހަރުހަވެތި  ޚުލްޤުތަކުން  އެންމެންނިކަން  ކަންކަންޗޭ

ވިދާޅުވޭ

މަގޭ ޔާގޫތު

ބިންމާ އިބްރާހިމް ވަހީދު

 

ގަސްކަރަ ފެހި، ފަސްގަނޑު ކަޅު އަދި ފެންމީރު ފުރަމާލޭގެ ފެނުން އިރު ތޮޅިލިއިރު، އަނދެގެން ހުރި މުންޑުން ބަޑިތަޅުވަމުން ގޭގެ ފުޅައްޔާ ދިމާލަށް އަލިހޮއްކޮ ހަރުކޮށް ހިނގާފައި އަ އެވެ. ލަސްވެއްޖެއްޔާ ދެން އެ ދުވަހު ނުފެންނާނެ ނަޔާ ޗާލު ޔާގޫތު ދުށުމަށެވެ. އިރުގެ ރަން އަލިން ބިމުގައި ދޫލަ ފެތުރުމުގެ ކުރިން، ކުނިކޮޅު ގޮނޑަށް އުކާލާފައި ގެ އަށް އަންނަން ސިއްތި ބޭނުންވެ އެވެ. މަންމަ ބުނެފައި އޮންނަ ގޮތަކީ އެއީ އެވެ. ވީމާ އަނދެގެން ހުންނަ ފޭއްޔަށް ނުކުޅަދާނަ ވާހާ ދުރުގައި ފައި އަޅަމުން، ހަލުވިކަމާ އެކުގައި ސިއްތި ހިނގި އެވެ. އަލިހޮއްކޮ އިންތިޒާރުކުރާ ދަނޑިވަޅަކީ އެއީ އެވެ. އަލިހޮއްކޮގެ ގެ ހުރަސްކޮށްފައި ސިއްތި ދާ ވަގުތެވެ. ސިއްރުން ބަލާލުން ފިޔަވައި އިތުރު އެއްވެސް ކަމެއް ކުރާކަށް އަލިހޮއްކޮއަކަށް ނުކެރެ އެވެ. ސިއްތި ނުވެސް ދެނަހުއްޓެވެ.

ހެދިހުރި ހަށިގަނޑު ޒުވާން، އުމުރުން ސަތާރަ އަހަރުގެ އަލިހޮއްކޮގެ ލޮލުގައި، ސިއްތި އަޅައިގަތީ، އަލިހޮއްކޮގެ އުމުރުން އެންމެ އެގާރަ އަހަރުގަ އެވެ. އަލިހޮއްކޮގެ މަންމަ ދިން އޮޑިހަނެއް ހިފައިގެން ސިއްތިގެ ގެ އަށް ދިޔަ ދިޔުމެއްގަ އެވެ. އެ ގެ އަކީ، ރަށުގެ އެހެން ގެތަކާ ތަފާތު ގޮތަކަށް ފަރުމާކޮށްފައިވާ، ބޮޑު ގެއެކެވެ. ގޭގައި ހުރި ބިޔަ ދޮރުތަކާއި، ބޮޑެތި ތަނބުތައް ފެނިފައި އަލިހޮއްކޮގެ ތަލިން ކުޅު ހިކުނެވެ. އެ ދުވަހު އެ ގެ އަށް ދިޔަ ދިޔުމުގައި، އަންހެނުންތަކަކާ އެކުގައި ސިއްތި ވެސް، އެ ގޭގައި ހުރި ގާފޮޅެއް މަތީގައި ހުއްޓިލައިގެން ހުއްޓައި އަލިހޮއްކޮ ދުށްޓެވެ. އަދި އެ ދުވަހު ސިއްތި ކުއްލިއަކަށް އަލިހޮއްކޮ އަށް ފުރަގަސްދިނުމުގައި، ފުން މާނައެއް އޮތްހެން އަލިހޮއްކޮ އަށް އޮތީ ހީވެފަ އެވެ.

ސިއްތިގެ ބުރުސޫރަރިވެތި މޫނާއި، ކުލަފަތިކަން ވެފައިވަނީ، ސިއްތިގެ މަންމަ ދަލޭކަ ނިދިން މަޙްރޫމު ކުރުވި ކަމަކަށެވެ. ސިއްތިގެ އުމުރަށް އިތުރުވި ކޮންމެ އަހަރަކާ އެކު، ޝާއްބަކަމަށް އިތުރު ފުރިހަމަކަމެއް އައި ސިއްތިއާ އިންނަން މީހުން ތެޅިފޮޅެނީ އެވެ. ދަލޭކަ ކިތަންމެ ބޮޑު ބޮކުސާއަކަށް ސިއްތި ލައިގެން ބަނދެގެން ހުއްޓަސް، ހަނދުވަރުކުރަފިތަކަށް އެކަން ސިއްރެއް ނުކުރެވުނެވެ. ހަނދެއް ފަދަ ސިއްތީގެ ހަނދުވަރު ދުށުމަށްޓަކައި، ގިނަ އަދަދެއްގެ ލާނެތް ޒުވާނުން ބިސްމަޅިދުއްވައިގެން ތިބެއެވެ. އެންބޭރުން މަތިއަނގޮޅި އަށް، އަދި ގަލުއޮޅިން ފަންނާ ހަމަ އަށް ވެސް، ސިއްތިގެ ޖާދޫ އޮތީ ފެތުރިފަ އެވެ. ވަގުތު ކުޑަތަންވަމުން އަންނަ ކަމާއި، ކަށިން މަދުނަގައިގެން ނޫނީ ސިއްތިގެ ހިތް ފަތަހަ ނުކުރެވޭނެކަން، އަލިހޮއްކޮ އަށް ގައިމުވި އެވެ.

ދުވަހެއްގެ ހަވީރުގެ ވަގުތެވެ. ވަރުގެކޮޅަށް ނަލަހެދިގެން، ވަރުގަދަ އުންމީދަކާ އެކުގައި އަލިހޮއްކޮ ގެއިން ނުކުތެވެ. ސިއްތި ދެކެ ލޯބިވާ ވާހަކަ ބުނުމަށްޓަކަ އެވެ. ގަސްތަކުގެ ސަބަބުން މަތި ބެދިފައިވާ މަގުގެ ތެތްކަމާއި، ހިތުވިންދު އަވަސްވެފައި ހުރުމުން، އަލިހޮއްކޮގެ އަތްފައި ހުރީ ފިނިވެފަ އެވެ. ނަސީބު ރަނގަޅުކަމުން، އުވަދޮންބެ އަންނަތަން އަލިހޮއްކޮ އަށް ފެނުނެވެ. އަލިހޮއްކޮގެ ނަޒަރު ހުރީ، އުވަދޮންބެގެ ބޯމަތީގައި ބަހައްޓާފައި ހުރި ފޮށިގަނޑަށެވެ. އަލިހޮއްކޮ ހުއްޓިފައި އަންބޮނޑި ހާވަން ފެށުމުން، ވާން މި އުޅޭ ގޮތް އުވަދޮންބެ އަށް ރޭކާލި އެވެ. ވުމާއެކު، އަލިހޮއްކޮ ކައިރި އަށް ހުއްޓިފައި، ބޯމަތިން ފޮށިގަނޑު ބޭލި އެވެ.

"ކިހާވަރެއް؟" އަލިހޮއްކޮ އެހި އެވެ.

"ހަމަ އެންމެ ފަންސަވީސް ލާރި އަށް ބައިލާހި،" އުވަދޮންބެ ބުންޏެވެ.

އަލިހޮއްކޮ ފަންސަވީސް ލާރި ދިނުމުން، ރޯބަކަރި ކިރު ފުޅިއެއް އުވަދޮންބެ ދިނެވެ. އެ ފޮށިގަނޑުގައި ގިނައީ ހުސް ފުޅި އެވެ.

"އައްދެއްޔޭ! އެންމެ ފުޅިއެއް މި އޮތީ ވެސް ދޯ؟" އަލިހޮއްކޮ އެހި އެވެ. "ހާދަހާވާ ތަދު ދުވަހެކޭ."

"އާނ!" އުވަދޮންބެ ފުން ނޭވައެއް ބޭރުކޮށްލަމުން ބުންޏެވެ. "މިއަދު ދަލޭކަ ހުރީ އަތްއަނބުރާލާފަ. ހީވަނީ އެ ގޭގަ ބޮޑުކަމެއް އޮތް ދުވަހެއްހެން."

"އެއީ ކޮން ކަމެއްބާ؟" އަލިހޮއްކޮ އެހި އެވެ.

"އުވަދޮންބެއަކަށް ތިއެއް ނޭނގެ،" ހިނގައިގަންނަމުން ދޮންބެ ބުންޏެވެ. "ހުސް ފުޅި ގެ އަށް ލައިދޭތި."

"އާނ! އެހެންވިއްޔާ މަޑުކުރޭ!" ފުޅީގައި ތުންޖަހަމުން އަލިހޮއްކޮ ބުންޏެވެ.

ތުންޖެހިގޮތަށް ފުޅި ހުސްކޮށްލުމަށް ފަހު ހުސް ފުޅި ދޮންބެ އަށް ދިނެވެ. އެ އަށް ފަހު، ބޭނުންވި މިސްރާބަށް ދަތުރު ފެށި އެވެ. އާ ހިތްވަރަކާ ފޯރިއަކާ އެކުގަ އެވެ. އެ ގެއާ ހަމަ އަށް ދެވުނުއިރު، އިރުއޮއްސިއްޖެ އެވެ. އަލިހޮއްކޮ ސިއްރުސިއްރުން ގެ އަށް ވަނެވެ. މުޅި ގެ އަށް ފެތުރިފައިވަނީ، އާދަޔާ ޚިލާފު މީރު ވަހެކެވެ. އަލިހޮއްކޮ ލަފާކުރި ގޮތުގައި، އެއީ ހުވަނދުމަލާއި ކަނީރުމަލުގެ ތެރެއަށް ޗަންޕާޕޫލުމާ އެކުވުމުން ދުވާ ކަހަލަ ވަހެކެވެ. އޭގެ އިތުރަށް، ލަންސިމުލާއި، މޫނިމަލާއި، އުނިމަލުގެ ވަސް ވެސް، ބައެއް ފަހަރު އަލިހޮއްކޮ އަށް އިހުސާސްކުރެވުނެވެ. އެ ގެއާ ދޭތެރޭގައި އަލިހޮއްކޮ އަށް ވިސްނާލެވުނީ އެ ވަގުތު އެވެ. ހައިވަކަރާއި، ބުރުދާ ވަކަރުގެ ބެރިތަކުން، ކޮންމެވެސް ސިއްރެއް ކިޔައިދޭން އުޅޭ ކަހަލަ އެވެ. ސައްކެޔޮ ލަކުޑިން ހަދާފައިވާ ދޮރުފަތްތަކާއި، އަލަމާރިތަކުގައި ލާފައިވާ ވަރުނީހުން، ދަޅަގަދަ އޮފެއް އަރަމުންދިޔަ އެވެ. ހީވަނީ، ކުޑަ އިރުކޮޅެއް ކުރިން ގެ އަލުން ޒީނަތްތެރިކޮށްފައިވާހެންނެވެ. އެފަދަ ކަމެއް އެ ގޭގައި ކުރާނީ ކާކު ބާއޭ އަލިހޮއްކޮ ހިތަށްއެރި އެވެ. ފެށުނީއްސުރެ ވެސް އެ ގޭގައި ދިރިއުޅެނީ ދަލޭކަ އާއި ސިއްތި އެވެ. ގޭގެ މެދުގޭތެރޭގައި، ހުރި ބޮޑު ހައިވަކަރު މޭޒުގެ ވަށައިގެން ގޮނޑިޖަހާފައި ހުއްޓެވެ. މޭޒުމަތި އޮތީ ހުހަށެވެ. މީހެއްގެ ފިޔަވަޅުގެ އަޑަށް އަލިހޮއްކޮ ދޮރުފަތާ ނިވާވި އެވެ. އެކަމަކު މީހަކު ނުފެނުނެވެ. ދޮރުގެ ނިވަލުން ނުކުމެފައި ބަލައިލިއިރު ކަމަކުދާކަށް ނެތެވެ. ކުރިން ހުހަށް ހުރި ބޮޑު މޭޒުގެ ސުފުރާމަތި އޮތީ ފުރިފަ އެވެ. އަލިހޮއްކޮއަކަށް ގަބޫލެއް ނުކުރެވުނެވެ. އެންމެ ދެތިން މިނެޓު ތެރޭގައި އެހެނެއް ނުވާނެ އެވެ.

"ދަރިފުޅާ؟" ދަލޭކަގެ އަޑު އިވުނެވެ.

"މި ނުކުންނަނީ." ސިއްތި ޖަވާބުދިން އަޑު އިވުނެވެ.

ސިއްތިގެ އަޑު އިވުނު ދިމާލަށް އަލިހޮއްކޮ ދިޔަ އެވެ. އަދި ފެންނަން ހުރި ބާކޮޅަކުން ކޮޓަރި އަށް ނަޒަރު ހިންގާލި އެވެ. ސިއްތި އިނީ އެނދުގައި އިށީނދެލައިގެންނެވެ. އެނދުމަތީގައި، ލާޖެހި ކުރަނޑި އާއި ދަޅުތައް ހުއްޓެވެ. އޭގެ ތެރޭގައި، ރަން އުޅާބަޔާއި، ރަން ތަކަހޮޅި އާއި ކަންފަތުލާ މުދިބަޔާއި އަދި ރަން ފައްޓަރުބައި ހުއްޓެވެ. ހަމަ އެހެންމެ، ރަން ކެވެއްޔާއި، ތަނޑި ވެސް ހުއްޓެވެ. ސިއްތި ލައިގެން ހުރީ ޕޫލްރަސަމް ނުވަތަ އަދާރަސަމް ފޮތީގެ ލިބާހެކެވެ. ފޭލީގައި، ރަނާއި ރިހިން ކަސަބުޖަހާފައިވެ އެވެ. ބޮލުގައި، ރަން ކިނާރީ އެޅި، މަޑު ނޫ ކުލައިގެ ތުނި ބުރުގާއެއް އޮތެވެ. ކުރިން ސިއްތި އަކީ ބުރުގާއަޅާ ކުއްޖެއް ނޫނެވެ.

"މަގޭ ޔާގޫތު!" މަޑުމަޑުން އަލިހޮއްކޮ އަށް ބުނެވުނެވެ.

ދިއްލާފައިވާ ބައްތީގެ އަލީގައި، ސިއްތިގެ މަޑު ފިޔާތޮށި ކުލައިގެ މޫނު، ޔާގޫތެއް ފަދައިން ވިދަމުންދިޔަ އެވެ. އެކަމަކު، ހިތުގައި އުތުރިއަރަމުންދިޔަ ސުވާލުތަކުގެ ސަބަބުން، އަލިހޮއްކޮގެ ހިތް އަވަސް ވާން ފެށި އެވެ. ވާން އުޅެނީ ކީއްހެއްޔެވެ؟ ގޭގައި ތައްޔާރުކުރެވިފައިވަނީ ކޮން ޖާފަތެއް ހެއްޔެވެ؟ ސިއްތި ޒީނަތްތެރިވަނީ ކީއްކުރަން ހެއްޔެވެ؟ ކުއްލިއަކަށް، މުޅި ގޭތެރެ އަށް އަލިގަނޑެއް އެރި އެވެ. ވަރަށް ވަރުގަދަ މީރު ވަހެއް ދުވި އެވެ. އެއާއެކު، ދަލޭކަ އައިސް، ސިއްތިގެ ކޮޓަރީގެ ދޮރުމައްޗަށް އެރި އެވެ. ސިއްތި ބަލައިލި އެވެ. އުންމީދުން ފުރިގެންވާ ބެލުމަކުންނެވެ.

"އަތުވެއްޖެ!" ދަލޭކަ ހިނިތުންވެފައި ބުންޏެވެ.

ދަލޭކަ އެއް ފަރާތަކަށް ޖެހިލުމާ އެކު، ހުދު ހެދުމެއްގައި ހުރި ބޮޑު މީހަކު ދޮރުމައްޗަށް ހުއްޓުނެވެ. އެ މީހާގެ ގައިގައި ހުރި ގަދަ އަލިކަމެއްގެ ސަބަބުން، އެއީ ޖިންނިއެއްކަން އަލިހޮއްކަ އަށް ގައިމުވި އެވެ. އެ ޖިންނި ފެނުމުން، އުފަލުން ފޮޅިފައި ސިއްތި ތެދުވި އެވެ. ޖިންނި އެތެރެ އަށް ވަނެވެ. އެހެންނަމަވެސް، ފިޔަވަޅެއް ނާޅަ އެވެ. ހީވީ، ފުރޮޅުލާފައި ހުރި އެއްޗެއްގެ މަތީގައި ހުރެފައި، އެ އެތި ދުއްވާފައި ވަތްހެނެވެ.

"ބައްޕާ!" ސިއްތި ބުންޏެވެ.

އެ ޖިންނި، އޯގާތެރިކަމާ އެކުގައި ސިއްތިގެ ބޮލުގައި ފިރުމާލި އެވެ. އަދި ސީދާ އަލިހޮއްކޮގެ ލޮލަށް ބަލައިލި އެވެ. އަލިހޮއްކޮގެ މޭގަނޑު އަތަށް ނައީ ކިރިޔާ އެވެ. އެހެންނަމަވެސް، އަލިހޮއްކޮއަކަށް އެ ޖިންނި އެއްވެސް ގޯނާއެއް ނުކުރެ އެވެ.

"އިންސާނެއްގެ އަތުގައި ދަރިފުޅު ޖެހުނަ ނުދީ މަންމަ ނިކަން ރަނގަޅަށް ބަލަހައްޓައިފި،" ޖިންނި ހަމަޖެހިލާފައި ބުންޏެވެ. "ބައްޕަ ބުނެފަ އޮންނާނީ، ދަރިފުޅު ހަކާވެ، މީހަކާ ދެވަން މަންމަ ބޭނުންވީމަ ބައްޕަ އަށް އަންގާށޭ. ދަރިފުޅަށް އެންމެ އެކަށީގެންވާ މީހުން އުޅެނީ އަހަރުމެންގެ ތެރޭގަ."

އިސާހިތަކު ގޭތެރެ ފުރުނެވެ. ސިއްތިގެ ކައިވެނި ޖިންނިއަކާ ކުރެވުނީ އަލިހޮއްކޮގެ ލޯކުރިމަތީގަ އެވެ. އަލިހޮއްކޮ އަށް ސިއްތި ނުލިބުނު ނަމަވެސް، ސިއްތި ލިބުނު މަޚުލޫގަކީ، އިންސާނަކާ އެއްވެސް ތަފާތެއް ނެތް، ކިތަންމެހާ ވެސް ރީތި، ހަރޮށި ފިރިހެނެއްކަމުގައި އަލިހޮއްކޮ ގަބޫލުކުރި އެވެ. އޭގެ ކުރިން ވެސް އަދި ފަހުން ވެސް، އެ ފަދަ ހައިރާންކުރަނިވި ހާދިސާއެއް އަލިހޮއްކޮ ނުދެކެ އެވެ.

ކައިވެންޏަށް ފަހު ސިއްތި ގެއްލުނީ އެވެ. ސިއްތި ގެއްލުނު ގޮތާ މެދު، ރަށުތެރޭގައި އެކި ގޮތްގޮތަށް ވާހަކަދެކެވުނެވެ. އެންމެން ހައިރާންވި އެއް ކަމަކީ، ސިއްތިގެ މަންމަ ހަމަޖެހިފައި ހުރީމަ އެވެ. ކިތަންމެ ބަޔަކަށް އަލިހޮއްކޮ އެ ވާހަކަ ކިޔައިދިނެވެ. އެކަކު ވެސް ގަބޫލެއްނުކުރި އެވެ. މީހުން ބުނި ގޮތުގައި، ސިއްތިގެ ޖާދޫގައި ޖެހިފައި އަލިހޮއްކޮގެ ހޭބުއްދި ފިލައިދިޔައީ އެވެ. ސިއްތި ކުއްލިއަކަށް ގެއްލުމުން، އިތުރު ތިން މީހުން އެކި ކަހަލަ މޮޔަ ވާހަކަދައްކަމުން ރަށުތެރޭގައި ހިނގި އެވެ.

"މަގޭ ޔާގޫތަކީ ޖިންނިއެއްގެ ދަރިއެއް!" އެކަނި އިނދެގެން އަލިހޮއްކޮ ކިޔަ އެވެ. "މަގޭ ޔާގޫތު އިނީ ޖިންނިއަކާ!"

)ނިމުނީ(

ވިދާޅުވޭ

ރީތި ކަތުރުފަނި

 

މޫސާ ލަތީފް

 

ކޮޓަރީގެ ތިން ތަނުގައި ތިން ފޮޓޯ ހުއްޓެވެ. އެއް ފޮޓޯގަނޑު ހުރީ ޓީވީ މަތީގަ އެވެ. އަނެއް ފޮޓޯގަނޑު ހަރުކޮށްފައި ވަނީ، ހައިވަކަރު އެނދުގެ ބޯލާކޮޅުގަ އެވެ. ތިން ވަނަ ފޮޓޯ ހުރީ ކޮޓަރީގެ އެއް ފަރާތު ފާރުގަ އެވެ. ތިން ފޮޓޯ ވެސް ނަގާފައި ވަނީ ވަކި ތިން ތަނެއްގަ އެވެ. އަދި ތިން ފޮޓޯގައި ވެސް ވަނީ އެކެކެވެ. އެއީ އުމުރުން ބާވީހަކަށް އަހަރުގެ ރީތި އަންހެން ކުއްޖެކެވެ. ދޮނެވެ. ފޮޓޯއިން ފަންނަ އިރު ވެސް މޫނުގެ ހަންގަނޑު ވަރަށް އޮމާންކަން އެނގެ އެވެ. ތުންފަތުގެ ކަނާތް ފަރާތުގައި ހުރި ކަޅު ތިލައިން އޭނާގެ ރީތިކަން އިތުރުކޮށްދެ އެވެ. ނުވަތަ ފިރިމީހާ ދެކެނީ އެހެންނެވެ.

ފިރިމީހާ ހުރީ ކޮޓަރީގެ ފާރާ ތިން ފޫޓެއްހާ ދުރުމިނުގައި، މައްޗަށް ބަލަހައްޓައިގެންނެވެ. ހަމައެކަނި އެ ފޮޓ ޯއަށް އަލި އެޅޭ ގޮތަށް، ސީލިންގައި ހަރުކޮށްފައި ހުރި ކުޑަކުޑަ ބޮކިން މަޑުމަޑު އައްޔެއް ފަތުރާލާފައިވެ އެވެ. އެ އަލި ގޮސް ޖެހިފައި ވަނީ، ފާރުގައި ހުރި ފޮޓޯގަނޑަށެވެ.

އަންހެނުންގެ އެ ފޮޓޯ އޭނާ ނެގީ ތުޅާގިރި ރިސޯޓްގެ ދޮން ފަސްގަނޑު މަތީގަ އެވެ. ވައިގަދަ ދުވަހެއް ކަމުން އޭނާ ބޭނުންވީ އަންހެނުންގެ ފަން އިސްތަށިގަނޑު، ވައިގެ ތެރޭގައި ނަށަމުންދާ މަންޒަރުން ހިތްހަމަޖެހުމެއް ގެންނާށެވެ. ފޮޓޯ ނެގުމަށް އޭނާ ދޭ ސަމާލުކަމާއި، ފޮޓޯ ނެގުމުގެ ހުނަރުގެ ތެރެއަށް ވަދެވިފައި ހުރިލެއް ބޮޑުކަމުން އެ ދުވަހު އޭނާ ނެގި ފޮޓޯ އިންތިހާ އަށް ރީއްޗެވެ. ކުޑަ ބޮކީގެ އަލި އެ ފޮޓޯގަނޑަށް އެޅިފައި ހުރި އިރު އަންހެނުން ހިނިތުންވަމުން އެ ދަނީ ހަނދުވަރުގެ ތެރޭގައިހެން އޭނާ އަށް ހީވެ އެވެ.

ފިރިމީހާގެ ލޮލުގައި ވަނީ ކަރުނަ އެވެ. އެކަމަކު އަންހެނުންގެ އެ ހިނިތުންވުން ފެނިފައި އޭނާގެ މޫނު މައްޗަށް ވެރިވީ މާޔޫސްކަމުގެ އަސަރުތަކެވެ. އަދި އެހާ އަވަހަށް އެ ހިނިތުންވުން، ކޮޓަރީގެ މަޑު އަލީގެ ތެރެއަށް ނެތިގެން ދިޔަ އެވެ.

ހޭން ޖެހޭނެ އެއްވެސް ކަމެއް ނެތެވެ. ހިނިތުންވުން ގެނެސްދޭ އުފަލެއް ވެސް ނެތެވެ.

އޭނާ މަޑުމަޑުން އަތް މައްޗަށް ނެގި އެވެ. ކޮރާލި އެވެ. ފޮޓޮގަނޑުގައި ހިފި އެވެ. ނައްޓާލި އެވެ. ދެން މަޑުމަޑުން ތިރިކޮށްލާފައި މޫނު ޖެހޭ ހިސާބަށް ކައިރިކޮށްލި އެވެ. ފުންކޮށް ބަލަން ފެށި އެވެ. ކަނާތުން، ފޮޓޯގަނޑުގައި އަތްކާއްތާލި އެވެ. އަންހެނުންގެ ރީތި ކަޅުތިލަ މަތީގައި ޝަހާދަތް އިނގިލި ޖައްސާލި އެވެ. ހީވީ އަންހެނުންގެ ހަށިގަނޑުގެ ހޫނުކަން އޭނާގެ ވިންދާ އެކުވެގެން ދިޔަހެންނެވެ. އޭނާއަށް ލޯ މަރާލެވުނެވެ.

ލޯ މަރާލައިގެން ހުއްޓެވެ.

އޭނާ ދޫކޮށްލާފައި އަންހެނުން އެ ދިޔައީ ކޮން ތަނަކަށް ހެއްޔެވެ؟ ކޮންމެ ފަހަރަކު ވެސް އޭނާއަށް ދޮގު ހަދަނީ ކީއްވެގެން ހެއްޔެވެ؟ ކޮންމެ ފަހަރަކު ވެސް އަންހެނުން މައާފުކުރާށޭ ބުނުމުން އޭނާއަށް އެ ވާހަކަ ގަބޫލުކުރެވެނީ ކީއްވެގެން ހެއްޔެވެ؟ އަންހެނުން ދޮގުހަދާކަމާ ދޭތެރޭ އޭނާގެ ހިތުގައި ޝައްކު އުފެދެނީ ކީއްވެގެން ހެއްޔެވެ؟

އެންމެ ފަހުން އޭނާއަށް އަންހެނުން ފެނުނީ މީގެ ތިން ދުވަސް ކުރިންނެވެ. އޭނާ ކޮޓަރި އަށް ވަތް އިރު އަންހެނުން ރީތި ވަނީ އެވެ. ފޮށި ފެނިފައި އަންހެނުންގެ މަގުސަދު އޭނާ އަށް ވިސްނުނެވެ.

"ތަނަކަށް ދާންތަ ތި އުޅެނީ؟" އޭނާ އެހި އެވެ.

"އާނ، އަންނާނަން ހަފުތާއެއްހާ ދުވަސްކޮށްލާފައި. މަރީމެން ބުނީ ހިނގާށޭ،" ލޯގަނޑުން ފަރިބަލަމުން، ހިނިތުންވެފައި އަންހެނުން ޖަވާބު ދިނެވެ. ފިރިމީހާ އޭނާއާ ކައިރިއަށް ޖެހިލި އެވެ. ލޯގަނޑުން އަންހެނުންގެ މޫނަށް ބަލައިލި އެވެ. އެ ކަޅުތިލަ އެވެ. އެ ތުންފަތެވެ. އެ ލޮލެވެ.

ފިރިމީހާގެ ހިތް ލޯބިން ފުރުނެވެ.

"މަރީމެން އެކަނިތަ ދަނީ؟" ފިރިމީހާ އެހި އެވެ.

"އާނ. މަރީ އާއި ފާތުން އާއި އަހަރެން،" ފަން އިސްތަށިގަނޑު ދެ ފަރާތު ކޮނޑަށް ފަތުރާލަމުން އަންހެނުން ބުންޏެވެ.

"އަހަރެންގެ މައްސަލައެއް ނެތް. އެކަމަކު މަންމަ...." ފިރިމީހާގެ ދުލުން ވާގި ދިޔައީ އެވެ. ލޯގަނޑުން އޭނާ އަށް ފެނުނީ އަންހެނުންގެ ދެ ލޮލެވެ. ލޮލުގެ ރީތިކަން ރުޅިވެރިކަމުގެ ވިލާގަނޑުން ފޮރުވާލި އެވެ. މޫނު މައްޗަށް އަނދިރިކަން ވެރިވި އެވެ. ހިތްގައިމު ތުންފަތުގައި ދުވަހަކު ވެސް ހިނިތުންވުމެއް ނެތް ފަދަ އެވެ.

"އަހަރެން ތަނަކަށް ދަންޏާ މަންމައާ ކޮން ބެހޭ ކަމެއް؟" އަންހެނުން އެނބުރުނެވެ. ފިރިމީހާގެ ހިތްވަރު މުޅިން އެލުނެވެ. މަންމަގެ ނަން ނުގެނެވުނު ނަމަ އެވެ. އޭނާ ބިރުގަތެވެ. އަންހެނުންނާ ވަކިވާކަށް ބޭނުމެއް ނުވި އެވެ. އެ ރީތިކަމުގެ އުފާ އޭނާ އަށް ވަރަށް މުހިންމެވެ. އެއީ އޭނާގެ ދިރިއުޅުމުގެ ވަޔެވެ. އެ ވައި ނުޖެހެންޏާ އޭނާއަކަށް ނޭވައެއް ނުލެވޭނެ އެވެ. ހާސްވާނެ އެވެ. މަރުވެދާނެ އެވެ.

"ދެން ރުޅި ނާދޭ. އެއީ އެއްވެސް ވާހަކައެއް ނޫން. ދޭ، އަވަހަށް ދޭ، އެމީހުންނަށް ލަސްވެދާނެ،" ފިރިމީހާ ބުންޏެވެ. ދެން ފޮށީގައި ހިފައިގެން ކޮޓަރިން ނުކުތެވެ. އަންހެނުން ލޯގަނޑާ ދިމާއަށް އެނބުރުނެވެ. ހިނިތުންވެފައި، އެންމެ ފަހު ފަހަރު ފަރިބަލަން ފެށި އެވެ.

އަންހެނުން ދިޔައީ އިންޑިއާގެ ބެންގަލޫރަށެވެ. ގެއިން އަންހެނުން ނުކުމެ، ޓެކްސީ އަށް އެރުމާ އެކު ފިރިމީހާ ވެސް ނުކުތެވެ. އޭނާ ބޭނުންވީ އަންހެނުންނާ އެކު ދަނީ ކޮން ބައެއްތޯ ބަލާށެވެ. ހުޅުލެއަށް މީހުން ފުރާ ހިސާބަށް ދިޔަ އިރު އަންހެނުންގެ ގްރޫޕެއް ނެތެވެ. ދެން އޭނާ ދިޔައީ ރަސްމީ ފާލަން ކައިރިއަށެވެ. ޖުމްހޫރީ މައިދާނާ އަރާހަމަވުމުގެ ކުރިން އޭނާއަށް އަންހެނުންގެ ގްރޫޕް ފެނުނެވެ. އަންހެނުންނާއި އަންހެނުންގެ ރައްޓެހި މަރީ ހުއްޓެވެ. އެ ދެ މީހުންނާ އެކު ލޯންޗަށް އެރީ ފިރިހެނެކެވެ. އެއީ ކާކުން ފިރިމީހާއަށް އެނގެ އެވެ.

އަންހެނުން އަބަދުވެސް ދަތުރުކުރަނީ މުއްސަނދިންނާ އެކުގައޭ، ފިރިމީހާގެ މަންމަ ބުނެ އެވެ. އެކަމަކު ފިރިމީހާ ގަބޫލުކުރަނީ އެގޮތަކަށް ނޫނެވެ. ފިރިމީހާ ބުނަނީ އަންހެނުން ދަނީ އަބަދުވެސް މަރީއާ އެކުގައި ކަމަށެވެ. މުއްސަނދިންނަކީ މަރީގެ ރައްޓެހިންނެވެ. އެހެންނަމަވެސް މި ދަތުރަށް އަންހެނުން ނުކުތުމުގެ ކުރިން މަންމަގެ ވާހަކަ ފިރިމީހާގެ ހިތަށް ވަނީ ހަމަ ކުއްލިއަކަށެވެ. ދެން މަންމަގެ ނަން ގެނެވުނީ ވެސް ކުއްލިއަކަށެވެ. އޭނާއަށް ހީވީ އޭނާގެ ބާރުގައި ކުރެވުނު ކަމެއް ނޫން ހެންނެވެ. އެއީ މައިވަންތަކަމުގެ ބާރަށް ވެދާނެ އެވެ.

މަންމަ ދެކެ އަންހެނުން ރުޅިއާދެ އެވެ. އިނީންސުރެ ވެސް މަންމައާ ދޭތެރޭ ހިތްހަމައެއް ނުޖެހެ އެވެ. އޭގެ ސަބަބަކީ، ފިރިމީހާގެ މަންމަ އަކީ ތެދު މަގުގައި ހުރި މީހަކަށް ވުމެވެ. ދަނބިދަރިފުޅުގެ ކޮންމެ ފިޔަވަޅަކުން އޭނާއަށް ފެންނަނީ ފާފައިގެ ނިޝާނެވެ. އޭނާގެ ހަށިގަނޑުން ދުވަނީ ވެސް ކޮންމެވެސް ފާފައެއްގެ ވަހެވެ. އެކަމަކު އެއްވެސް އަމަލެއްގައި ވަހެއް ނުހުންނަން ފިރިމީހާ އަށް ވެސް އެނގެ އެވެ.

މަންމަ އަށް އެއަށް ވުރެ ގިނަ ކަންތައްތައް އެނގުނެވެ. އެހެންކަމުން ހުރިހާ ކަމެއް އަބަދު ނުދެކެންވެގެން މަންމަ އެގެއިން ނުކުތީ އެވެ. މަންމަގެ ވާހަކަތަކުން ގޭތެރެ ހިމޭންވުމުން ފިރިމީހާއަށް ހަމަޖެހުމެއް ލިބޭނެކަމަށް އޭނާއަށް ހީވި އެވެ. އެކަމަކު އެ ހަމަޖެހުން އޮންނަނީ އަންހެނުން ކައިރީގައި ހުންނަ އިރު އެވެ. އަންހެނުން ބޭރަށް ދިއުމުން މަންމަ ނެތުމުގެ އުނިކަން އޭނާގެ ދިރިއުޅުމަށް ވަދެ ގޯނާކުރަން ފަށަ އެވެ.

އޭނާގެ ދިރިއުޅުން އެންމެ ފަހުން ބަދަލުވީ ހިމޭންކަމަކަށެވެ. އެ ހިމޭންކަމުގައި ވަނީ އެންމެ އުފަލެކެވެ؛ އަންހެނުންގެ ރީތި ސޫރަ އެވެ. އެ ލޮލެވެ. އެ އިސްތަށިގަނޑެވެ. އެ ތުންފަތެވެ. އެ ކަޅުތިލަ އެވެ.

އެރީތިކަމުން އޭނާގެ ހިތް ވަނީ ބަލިކަށިވެފަ އެވެ. އޭނާ އަށް ބާރަށް އެއްޗެކޭ ބުނާކަށް ނުކެރެ އެވެ. ދަރިއަކު ބޭނުމޭ ބުނާކަށް ނުކެރެ އެވެ. ކަންތައްތައް ސާފުކުރަން ސުވާލުކުރާކަށް ނުކެރެ އެވެ. އޭނާއަށް ރުޅިއެއް ނާދެވެ އެވެ.

އަންހެނުންގެ ހިނިތުންވުމުން އޭނާގެ އެކަނިވެރިކަން ފިލުވައިލަ އެވެ. އޭނާގެ ހުރިހާ އިހުސާސްތަކެއް އެއް ކަމަކަށް އެދެން ފަށަ އެވެ. އަންހެނުންނަށް އޭނާގެ އެ ބަލިކަށިކަމުގެ ފައިދާ ނަގަން ރަނގަޅަށް އެނގެ އެވެ. އެހެންކަމުން އެ ފައިދާ އަބަދުވެސް އޮންނަނީ އަންހެނުންނަށެވެ. އޭނާ އަށް ޖެހިފައި ވަނީ އަންހެނުންގެ ދަތުރުތަކަށް ތަން ދޭށެވެ. އަންހެނުންގެ މަޖާކުރުމަށް ހުރަސްނާޅާށެވެ.

މަންމަ ވީ މަންމަގެ ގޭގަ އެވެ. އޭނާ އެހެރީ އޭނާގެ ގޭގަ އެވެ. އަންހެނުންގެ ފޮޓޯގަނޑު ހިފައިގެންނެވެ. އެ ފޮޓޯގަނޑު ނަގާކަށް އޭނާ ބޭނުމެއް ނޫނެވެ. އެކަމަކު މިދިއަ ތިން ދުވަހުގެ ތެރޭ އޭނާގެ ސިއްހަތު ބަދަލުވެއްޖެ އެވެ. އޭނާގެ އިހުސާސްތައް ބަދަލުވެއްޖެ އެވެ. އޭނާގެ ވިސްނުން ބަދަލުވެއްޖެ އެވެ.

އޭނާ އަށް ހީވަނީ އަންހެނުންގެ ރީތިކަމާ ދުރަށް ދާން ޖެހިދާނެ ހެންނެވެ. ފޮޓޯގަނޑު ނެގީ އޭގެ ފުރަތަމަ ފިޔަވަޅުގެ ގޮތުންނެވެ. ފޮޓޯގަނޑަށް ބަލަހައްޓައިގެން ހުރެ މަޑުމަޑުން ގޮސް އެނދުގައި އޮށޯތެވެ. އަނެއް ދެ ފޮޓޯގަނޑު ނަގަން ބޭނުންވީ އިރުކޮޅެއް ފަހުންނެވެ. އެހެންކަމުން، ވައިގެ ތެރޭގައި އިސްތަށިގަނޑު އުދުހެމުން ދިޔަ މަންޒަރު ފެންނަ ފޮޓޯ މޭ މަތީގައި ބާއްވާލައިގެން އޮތެވެ. ދެން ލޯ މަރާލި އެވެ.

ފެންނަނީ އަންހެނުން އެހެން މީހެއްގެ އަތު ތެރޭގައި އޮތް ތަނެވެ. ބެންގަލޫރުގެ ހޮޓަލެއްގެ ރެސްޓޯރެންޓް ތެރޭގައި މަޖާކުރަމުންދާ ތަނެވެ. ހެނީ އެވެ. އޭނާއާ ދޭތެރޭ ކުޑަކޮށް ވެސް ނުވިސްނަ އެވެ. އޭނާގެ ހިތަށް ވާނެ ތަދަކާ ދޭތެރޭ ކުޑަ ވެސް ހިޔާލެއް ނުކުރެ އެވެ. އޭނާގެ މޭ ތެޅޭވަރެއް އަންހެނުންނަކަށް ނޭނގެ އެވެ.

އަންހެނުން ފުރި ދުވަހުގެ ރޭ އޭނާ ޑޮކްޓަރަށް ދެއްކުމުން ހޮސްޕިޓަލުގައި ބޭއްވީ އެވެ. ދޫކޮށްލީ ދެ ދުވަސް ފަހުންނެވެ. ކޮޓަރީގެ އެނދުގައި އޮށޯވެ އެ އޮތީ ހޮސްޕިޓަލުން އައި ހެވެ. ޑޮކްޓަރު ބުނީ ކަންތައްތަކާ ފިކުރު ނުކުރުމަށެވެ. ނުވިސްނުމަށެވެ. އެކަމަކު އަންހެނުންގެ ރީތިކަމުގެ ތެރެއިން އޭނާގެ ހިޔާލުތައް ދުރަށް ޖެއްސޭނެ އެންމެ ސިކުންތެއް ވެސް ނުލިބެ އެވެ.

ހިތް މާ ބާރަށް ތެޅެނީ އެވެ. އޭނާ ލޯ ހުޅުވާލަން އުޅުނެވެ. އެކަމަކު ސިއްހަތު އެކަމަކަށް ތަނެއް ނުދިނެވެ. އޭނާ އަށް ފެނުނީ އަންހެނުންނެވެ.

އޭނާގެ ރީތި އަންހެނުންނެވެ. ނަލަ ހިނިތުންވުމެވެ. އެ ކަޅުތިލަ އެވެ. އެ ތުންފަތެވެ. ލޮލެވެ. އިސްތަށިގަނޑެވެ. އެއިން އެއްވެސް ތަނެއްގައި އޭނާ އަށް އަތްޖައްސާލެވޭނެ ގޮތެއް ނެތެވެ.

މަރުވަމުން ދިޔަ އިރު ދުނިޔެ އިން އޭނާ އަށް ލިބުނު އެއްވެސް އެއްޗެއް ނެތްކަން ވިސްނުނީ ވަރަށް ކުޑަކޮށެވެ. އޭނާ އަށް ދުނިޔެ އިން ފެނުނީ ހަމައެކަނި އަންހެނެއްގެ ރީތިކަމެވެ. އެނޫން އެއްވެސް ކަމަކާ ދޭތެރޭ އޭނާ ފިކުރެއް ނުކުރެ އެވެ. އެކަމަކު އެ ރީތިކަން މަޑުމަޑުން އޭނާގެ ދިރިއުޅުން ކަމުން ދިޔައީ އެވެ. އޭނާ އަށް ނޭނގޭ ވަރަށް، އޭނާ އަށް ރޭކާނުލާ ވަރަށެވެ.

(ނިމުނީ)

ވިދާޅުވޭ